صلاه من طفل لــ ربنا
ــــــــــــــــــــــــــــــ
ربنا حبيبى ....
أتمنى تكون فاضي شوية
أنا نفسي اشوفك من زمان / نفسي اشكرك
وصلِتني اللعب الحلوة اللي انت باعتها
وكمان القطة بتاعتي بتدعيلك
علشان خليت ماما تسيبها وماتطردهاش
آه على فكرة
الميس بتاعتنا كمان بتحبك موت
وبشوفها كتير بتصليلك وقت الفُسحة
ماما قالتلي
ان انت ندَهت لبابا زمان
وقالتلي انه مسافر عندك
لو كان قاعد جنبك قول له
اني باحبه
ماما قالتلي انه كويّس
وانه بيضحك
وانك موجود
بس المفروض اني اشوفك
انا فاضي الاحد وهاستناك وهابُص عليك من البلكونة
والله ماهاحكي لحد خلاص
أنا والله باحبك جداً
"
وليه تخلّي الدنيا ساقعة ف المدارس
وليه تخلّي الورد يطلع شهر مارس
وسؤال تاني
الشمس اما تروّح بالليل بتروح على فين !
والمطرة بتنزل ليه ومنين ؟
واشمعنى الفيل له زلومة
والنيل امتى هيخلص خالص
و ... معلش اسف اني طوّلت الكلام
وانا عارف انك مش فاضيلي كل ده
انا قولت بس اطمنك اني بخير
وبفكرك بمعادنا يوم الاحد
شكراً قوي وربنا يخليك يارب
باي باي
ليست هناك تعليقات:
إرسال تعليق